Inkasta oo nidaamka dimuqraadiga ee aynu qaadanay uu yahay mid aynu ka doorbidnay nidaamyo badan ooย dunida hadda ka jira, haddana waxa muuqata in caqabadaha iyo mushkiladaha aynu ka dhaxalnay ayย yihiin kuwo lugta jiidaya horumar bulsho, mid dhaqaale iyo mid siyaasadeed oo aynu gaadhno.
Waxyaalaha ugu weyn ee dhabaha ka leexiyay hadafkii iyo ujeeddadii aynu u aasaasnay nidaamka doorashooyinka madaxa banaan, wax kow ka ah, afkaarta qabyaaladda iyo siyaasadda isxambaarsan ee gayigeenna sida dabaylaha u ruxaysa. Arrintaasi oo udub dhexaad u ah, mushkiladaha iyo kacaa-kufka siyaasadeed,ย bulsho iyo dhaqaale ee innagu gadaaman.
Haddaba waxa uu maanta qoraalkaygan koobani daarran yahay, sidii aynuย u soo xulan la hayn xildhibaanno iyo masuuliyiin gudan kara shaqada ay u igman yihiin, islamarkaana bulshadooda ugu adeegi karaย hufnaan iyo daacadnimo.
Sida aynu ognahay, ummadaha ka faa’iiday nidaamka doorashooyinka madaxa banaani waxay ku bineeyaan,ย masaaliixda iyo danaha ay leeyihiin oo badhax la’. Qofka ay shaqo u diranayaanna waxay ku qiimeeyaan aqoontiisa, kartidiisa, hufnaantiisa, khibradiisa iyo aragtidiisa.
Innagu se, waynu ka duwan nahay oo waxaynu ku qiimeynaa, qolada iyo reerka uu ka soo jeedo. Taasi oo ah, eesha iyo xuddunta ugu weyn ee uu ka xagal-daacayo habsami-u-socodka hannaanka dimuqraadiyadeedย ee aynu hirgalinaynaa.
Si kastaba ha ahaatee, waxayย xaqiiqdu tahay in ay maanta inna horyaalaan fursado iyo jaanis dahabi ah ooย u baahan in aynuย si waafiya uga faa’iidaysano, ugana baaraandagno cidda aynu codkeena siinayno, si aynaan barri uga qoomamoonin najiida iyo midhaha ka soo go’a ficilka aynu maanta samaynayno.
Sidoo kale,ย qastiga iyo ujeeddada ugu weyn ee aynuย doorasho madax banaan ka leenahay waa, in ay shacabku gacantooda ku soo doortaan cid hanan karta masuuliyadda iyo ammaanada loo dhiibayo.
Waa masuuliyad iyo xil inna saaran, in aynu si dheer iyo si dhowba uga fikirno, cidda aynu maanta codkeena siinayno, inaga oo waliba, si ildheeriyi ku jirto u fiirinayna mustaqbalka iyo aayahร dalkeena.
Waa nasiibdarro iyo talo-xumaan innagu habsatay, in aynu maalin walbaย beelaysi iyo reernimo ku keeno kuwii ugu liitay, ugu aqoonta liitay, ugu aragtida liitay, ugunaย musuq-maasuqsanaa. Sidoo kalena aynuย doorasho kasta ka dhaxalno uurkutaalo iyo niyad-jab.
Ugu denbeyn, waxaan ku talin lahaaย in aynu qaadno seddexdan tallaabo ee soo socda;-
1)talaabada koobaad; waa in aynu bulsho ahaan garwaaqsanaa, in aanay kada-loob iyo fadhi waxba innoogu hagaagaynin, islamarkaana ay daruuri tahay,ย in la abaabulo bulshada qaybaheeda kala duwan, laguna dhiiri-galiyo in aanay beeluhu soo xulanin, cid aan ehel iyo aqrab u ahayn, xilka iyo masuuliyadda loo dhiibayo.
2) talaabada labaad; waa in xisbiyada lagu cadaadiyo in aanay ku darin liisaskooda xubnaha ugaย qaybgalaya doorashada soo socota, shaqsiyaad ร an la hayn astaamihii iyo shuruudihii looga baahnaa qof u adeegi kara bulshadiisa.
3) talaabada seddexaad; waa in aynu dhexda u xidhanaa sidii aynu gabi ahaanba meesha uga saariย lahayn qaabkan aynu hadda wax ku doorano ee ahย beelaysiga iyo qabyaaladda, si loogu guuro qaab ku dhisan dagmo iyo gobollo.