Tixdan curinteeda waxa aan u holladay mar aan ku hamiyay qoridda dhigane ka hadlaya aqoonta maamulka. Waxaan dhex jibaaxay sugaanta Soomaalida, badkasta oo ay tahayba si aan uga soo dheegto tuducyo tilmaamaya muhiimadda maamulku u leeyahay nolosha. Hase ahaatee waan waayay gabay ama maanso kale oo si toos ah u abbaaraysa dhookhayga, sidaa darteed aniga oo ka duulaya marin baxsan haddaad waydo mid baa la banaystaa, ayaa gabaygan gaaban abuuray 26/1/2016.
Maansadan magaceedu waa “Maamul” dulucdeeduna waxa ay ku wareegaysaa uun waxtarka maamulku u leeyahay keli iyo ka badanba.
Hal magac maamuuseed oo ku jiraa tixdan ayaa ah “Oday” oo aan ula jeedo “Maxamuud Axmed oday”. Waa bare sare oo aqoonta maamulka ka dhiga jaamacadda Burco.
Maansadii Maamul wuxuu tidhi,
Isku duubni wadarnimo aboor kaa u aayoo
Aqal baaxad wayn buu ku ebyaa ayaamoo
Awooddiisa muruq buu ku igdhaa aqoontoo
Intuu maamul adag diro cidba meel ku aadshaa
Kuwo iilal jeexoo oo soo qufa awaaraha
Kuwo ayda xulayoo u kalaha arsaaq dalab
Kuwo urusha dhooboo loo igmaday walaaqiyo
Kuwo amara bixintiyo u astaysan jeedaal
Intaas oo ordaayo itaalkooda isu ulay
Nolol aaya tiin lay ibaheed salaaxaan
Umalkiyo darxumaday illinkeeda awdaan
Ubadkooda korayay aayo u yagleelaan
Madi iyo irmaanbay tacab ugu abuuraan.
Is dhexyaaca waxa fala ummaddii tirmaysa e
Amar kala sarrayn ixtiraamis wadatiyo
Wayeel iftiinshoo dedanaha ogaankara
Aafada qarsoon iyo siraa awdan fagi kara
Ifafaalayaashiyo akhrinkara ayaamaha
Ooshuu ka maqanyahay ama aan adeecini
Arrad iyo ibaar iyo eedba way mudan
Filanwaayo uguba na aragoodu wuu qaban.
Idilkiiba noolahu awood wuxuu ku yeeshaa
Ayaamaha qadhaadh iyo aafada ku jidhaa
Belaayada olkaysiyo ku afwaajiyaa nacab
Orogob maata qaadiyo aadumada ku joojaa
Omoskiyo qayoodkana aqal kaga samystaa
Anfaacigiyo dheeftana firigeeda aastaa
Marka uu iskaashiga samihiisa aamino
Itaalka iyo dadaalkana isasudho karaan kii
Ujeedada wadaagga ah idil loo ruqaansado.
Askartaba dagaalada abbaaduul horkacayoo
Awooddooda cariyoo, adkaysiiya beerkoo
Marka la is abbaarna, erey dhiirri gelineed
hoy aarso wiiloow, haw nuglaan asaagaa
dhegta kaga afuufoo kolba dib u abaabula
Aleen dhiilla gelineed hadba kaga ibriiqiya
Aahdiyo baroortiyo oohintiyo jibaadada
Kuwa uurku hoos yaal, fara inay illaawwaan.
Geesigaa ammaanta le ku astaysan dhiirida
Aarkaa maqnaantii arrin fulay bal faallee?.
Odayoow oowoow, dawlinimada unugeed
Maaraayn adayg iyo maamul iin la’ inay tahay
Eexda oo la laaliyo iilashada fogaynteeda
Mataanayn itaaleed ku axadhan qorashay iyo
Habaynta oo abbaar sugan ku astaysa aadmiga
Adigaa akhriya oo dhaaxa nagu afuufee
Dawgii irmaanaa illinkaad na tidhi mara
Adimadu dhankiibay tallabada ku aadaan
Ubaxaad abqaashiyo soo fufe iniinyii
Awoodaha ilaahay ku ilaashe odayoow.
Curin: khadar Faarax Siciid
Email: dalmartogdheer@gmail.com