Waa maanso cusub oo uu tiriyey Xasan Daahir Ismaaciil “Weedhsame” xildhibaanada lacagta qaata ee dana shacabka ilaaway.
Inta badan Xildhibaanada ayaa waxa lagu sifeeyaa qaar ka doorbida danka shacabka danta calooshooda ee qaraamaadka yar ee ay ka qaataan hadba mooshinka socda.
Maansada cusubina waxay u dhignayd sida tan:
Caku mudanahaygii
Mooryaantu dhaantoow
Dhiig miirtihiiyoow
Kii loo mashxaradee
Isna nagu maqnaayee
Quus nagu macsuumoow.
Maxastiyo Adduunkii
Macaluul ku nooshiyo
Wadhatada miskiinta ah
Laga faro maroojiyey,
Sawtaad malaayiin
Moohaar ku gurateen,
Iimaan macbuud baa
Uur madhane buuxshee
Xaaraanta maandhoow
Ma mahadin hortaa jire.
Milladii islaamkiyo
Dhaartaad marteeniyo
Xaqa muuminiintiyo
Ducadii madluunkee
Toos loo maqlaayiyo
Mawdkiyo xabaashiyo
Munkar iyo nakiiriyo
Qabrigii madoobaa
Ee maro cad mooyee
Maal lala tegayniyo,
Muduciga qiyaamaha
Maxkamada ilaahay
Kugu maadsanaayiyo
Xaaraanta maandhoow
Cishadaa macaanayd
Muruqaad ku xoogtiyo
Midigtaad ku taabtiyo
Dhuuntii ad marisaa
Kugu marag furaysiyo
Mustafaha warkiisii
Moogaha illaawoow
Magac dhawristiiyo
Dhaqankii masuulnimo
Xil kaskiyo marwaadkii
Maydhaamihiiyoow,
Xasan Daahir Ismaaciil “Weedhsame”