Kolka aad si kalfuran oo daacadnimo leh u weydiiso qofkii kale su’aalahaas noloshiisa ku saabsan, si degan oo dhugasho leh u dhegayso jawaabaha. Dhegayso oo ha ka dhexgalin. Madaxa u rux, dhoolacadee; dareenkaagana ha ka jeedin.
Mar kasta oo ka sheekaynta naftaada aad ka doorbido dhegaysashada kuwa kale, waxa aad dareemi doontaa qiimaha naftaada; kuwa kalena sidoo kale waxa ay dareemi doonaan qiimaha naftaada. Dareenadan togani waxay isu rogaan difaac adag oo nafeed. Mar kasta oo aad samayso ama aad tidhaahdo waxyaabo kuwa kale dareensiinaya wanaagga nafahooda, hab-dhaqanadaasi waxa ay ku tolmaan shakhsiyadaada; waxana ay noqdaan qayb dabeecaddaada kamid ah.
Sifada Lixaad
Sifada lixaad ee dabeecadda sharfooni waa deganaanshaha. Xaqiiqadu waxa ay tahay, keliya dadka isku kalsoon ayaa ah kuwo deggan. Dadka inta badan aan tixgelinin dareenada kuwa kale, waa kuwo daciif ah oo ay daacadnimadu ku yar tahay. Guud ahaan sharfidda nafahoodu aad ayey u hooseysaa. Waxay inta badan dareemaan amni daro iyo qabyo.
Ragga iyo dumarka isku kalsooni waa dadka ugu naxaariista iyo deganaanshaha badan ee aad abid la kulmi doonto. Marka aad tahay qof degan oo u dulqaata, u naxariista; una beerjileeca kuwa kale, duruuftii doontaaba ha jirtee, gudahaaga waxa aad ka noqotaa qof gob ah. Waxa aad kuwa kale ku yeelan doontaa saamayn togan oo aad u badan. Waxa aad noqon doontaa mid aad loogu riyaaqo; loona ixtiraamo. Saamayntaadu aad ayey u weynaan doontaa. Sifooyinkan kula dhaqan xaaskaaga iyo ubadkaaga, saaxiibbadaa iyo shaqaalahaagaba; waxana ku yaab gelin doonta saamaynta aad ku yeelato.
Qore: Maxamed C/Kariim Axmed (Shiil)
Bandhige@gmail.com