Sidee dhacdooyinku inoogu kala horeeyaan? todobaadkan saddex dhacdo ayaa la qaadaa dhigayaa: buulkii khayriyada ka taagnaa ee cagafta la geliyay, laba garoon oo hanti guud ah oo dowladu si hoose uga gadayso qowlaysato inagu dhex nool; iyo natiijada imtixaanka shahaadiga ah ee dugsiyada dhexe iyo sare.
𝑨𝒓𝒊𝒏𝒕𝒂 𝒃𝒖𝒖𝒍𝒌𝒂: Waxay tusaale u tahay maamul xumo, aragti daro iyo tookh. Waxaase kasoo uraya musuq maasuq iyo hanti dowladeed oo sifo sharci daro ah lagu leexsaday. Si, tuhunkaas bulshadu qabto meesha looga saaro, waxay ahayd, haddii dowladi jirto, in hanti-dhowrku si daah fur u baadho, wixii qalad ah ee uu helo xeer ilaalinta u gudbiyo, kadib kuwa danbigaasi ku cadaado, maxkamad lagu soo taago. Imikaba ashkhaas bulshadu garanayso ayay dimadoodu dhaawacan tahay oo maxkamada Public Opinionku xukuntay, waxaase fiicnaa in maxkamad sharci ay xukunto ama bari yeesho. Laakiin u fiirso, anigu waan afeeftay oo waxaan idhi haddii dowladi jrito.
𝑨𝒓𝒊𝒏𝒕𝒂 𝒈𝒂𝒓𝒐𝒐𝒏𝒂𝒅𝒅𝒂: Waa musiibo aad u wayn, waayo degmada arintani khusaysaa waa degmo ka aradan adeega bulsho ee dowladi bixiso oo dhan. Waa degmo hafran, hafarkaasna ogol. Bulshada waxa la gudboon inay in abaabusho, gudi madax banaan oo daacadnimo laga rajaynayo ay doorato, kuwaas oo lasoo warbixiya boobka loo maleegayo boqcada yar ee kasii hadhay wixii la wada lahaa.
𝑨𝒓𝒊𝒏𝒕𝒂 𝒏𝒂𝒕𝒊𝒊𝒋𝒂𝒅𝒂 𝒊𝒎𝒕𝒊𝒙𝒂𝒂𝒏𝒌𝒂: inta aan ogahay cid si cilmiyaysan u gorfaysay oo guul daradu inta ay leeg tahay ina tustay waxa jira Xasan Daahir – Weedhsame. Wuu ku mahadsan yahay feejignaantiisa iyo baraarujinteena. Wax barashadu waa halbeega horumarka dalka. Marka wax barashadu dunto, dhamaan qaybaha kale oo noloshuna way dumaan- bulsho wax barashadeedu liidato oo talaabo hore u qaadayna lama sheegin. Dowlad xilkas ah oo nafteeda ixtiraamaysa, bulshadeedana la xisaabtan ka ogol, haddii natiijada Soomaaliland usoo baxday usoo bixi lahayd way is casili lahayd, oo doorasho degdeg ah ayaa la qaban lahaa. 𝘏𝘢𝘥𝘥𝘢 𝘸𝘢𝘹𝘢𝘢𝘯 𝘬𝘶 𝘪𝘥𝘩𝘪 𝘥𝘰𝘸𝘭𝘢𝘥 𝘹𝘪𝘭𝘬𝘢𝘴 𝘢𝘩 𝘰𝘰 𝘯𝘢𝘧𝘵𝘦𝘦𝘥𝘢 𝘪𝘹𝘵𝘪𝘳𝘢𝘢𝘮𝘢𝘺𝘴𝘢!!
Isu geynta sadexdaa arimood iyo boqollaalka kale ee sida joogtada ah aynu uga qaylilaynaa, inoogu filan daliil in nimaadka wadanka ka taliyaa ku fashilmay wixii loo igmaday- beyond a reasonable doubt. Inagoo difaacayna qadhiidhka kasii hadhay dowladnimadii, xalku waa in isbedel degdeg ah oo nidaamkan gunta ka rujiya la helo- taasna laga wada qayb qaato.
Qore: Dr-Abdikarim D Hassan
Bandhige@gmail.com