Caawa uun baan Facebook ku arkay ummad bogaadinaysa iyo kuwo buuri ku tufaya dhallinyaradii xayeysiiska dharka ka sameeyay Hargeysa. Kaddibna wiil ka mid ah raggii hawsha ku jiray ayaan wareystay, waxaanu inta diiddan ku tilmaamay “Badawyo laga keenay baadiyaha iyo kuwo bilic-xun oo ka baqaya inay bannaanka is-keenaan”. Wuxuu sheegay inay tahay shaqo bannaan.
Wiilkani isaga oo sheegaya sida xayeysiisku u yahay shaqo laga sameeyo lacag badan, isla markaana baaq u diraya inta dhaliilaysa waxa uu yidhi:
Baagamuundo anigoo ah buu, baaqu ii yimiye
Intaan biir ka soo ganacso idhi, booli maan gadine
Xayeysiisku waa shaqo bannaan, waana loo boogaye
Waa beeca ficil kaabayoo, baahi loo qabaye
Balyuunniyo wax lagu xoogsadaa, biniga doolaare
Burjiyaalna waa laga dhistaa, baro la seexdaaye
Beekhaamba waa tuu ku helay, bawnka faraweyne
Badladaha judhii aan xidhaa, beenso loo huraye
Best suudh ah, shaadh biida iyo, garanno cow boya
Markaan soo bandhigay waa kuwaa, boobay aadmiguye
Waa baratakool-xumo inay, nagu biqleeyaane
Badawgiyo garaad-laawehaan, boowe garanayne
Sidii bahalka kii fool-xun baa, been cad soo qora’e
Bilicdiisu kay liidataa, wuu ka baqayaaye
Iyagoo bakhtiyay haddana, dibinta buuraaye
Bulshayahay adduunyada kalaan, beretemaynnaaye
Barbarteennu hawl bay qabteen, baaxadloo culuse
Ku bogaadin mooyee wax kale, beerku muu filinne
Baadiyaha dar laga keenayow, buuqu guul ma lehe
Ku soo biir, bilaa camal arlada, baanayaa jira’e!