Mowliid Maxamuud Ibraahim oo hore u ahaan jiray Wasiir-Xigeenka Arrimaha Dibedda, maanta laga bilaabo wuxu ahaanayaa Wasiir-Xigeenka Xidhiidhka Goleyaasha iyo Cilmibaadhista, jagadiisiina waxa loo magacaabay Axmed Aadan Ismaaciil “Keyse.”
Sidaa waxa lagu sheegay war-saxaafadeed mar dhaw ka soo baxay qasriga madaxtooyada. Madaxweyne Siilaanyo ma sheegin sababta uu Mowliid ugu beddeley wasaarad meeqaam ahaan tiisii ka hoosaysa.
War-saxaafadeedka oo dhammaystiran hoos ka akhristo.
Madaxweynaha Jamhuuriyada Somaliland Mudane Axmed Maxamed Silaanyo waxa uu digreeto madaxweyne oo summadeedu tahay JSL/M/XERM/249-3392/062015, ku magacaabay wasiir ku xigeenka Arrimaha dibeda Somaliland, isaga oo wasiir ku xigeenkii horena u bedelay Wasaaradda Xidhiidhka Goleyaasha, Cilmi Baadhista iyo Technology-yadda.
Madaxweynuhu:-
Markuu Arkay: Qodobka 90aad, Faqradiisa 2aad ee Dastuurka Jamhuuriyadda Somaliland;
Markuu Tixgeliyey: Ahmiyadda weyn ay Wasaaraduhu u leeyihiin Dalka iyo dhismaha Qaranka;
Markuu Arkay: In baahi loo qabo buuxinta jagada Wasiir Ku-xigeenka Wasaaradda Arrimaha Dibedda iyo Iskaashiga Caalamiga ah ee Jamhuuriyadda Somaliland;
Markuu Ka Fiirsaday: Kartidiisa, aqoontiisa iyo hufnaantiisa shaqo;
Markuu Ku Qancay: In uu hanan karo xilkan loo magacaabay;
Wuxuu go’aansaday
In Mudane, Axmed Aadan Ismaaciil (Keyse), laga bilaabo taariikhda maanta uu ahaado Wasiir Ku-xigeenka Wasaaradda Arrimaha Dibedda iyo Iskaashiga Caalamiga ah ee Jamhuuriyadda Somaliland.
Beddel (Wasaaradda Arrimaha Dibedda iyo Iskaashiga Caalamiga ah)
Wuxuu go’aansaday
In Mudane, Mawliid Maxamuud Ibraahin, laga bilaabo taariikhda maanta uu ahaado Wasiir Ku-xigeenka Wasaaradda Xidhiidhka Goleyaasha, Cilmi Baadhista iyo Technology-yadda ee Jamhuuriyadda Somaliland.
ALLAA MAHAD LEH
Axmed Saleebaan Maxamed (Dhuxul)
Af-hayeenka Madaxtooyada JSL.