Xaflad Khamiistii lagu qabtay hoolka shirarka ee Dalladda Ururrada Dhallinyarada Somaliland ee SONYO ayaa lagu daah-furay mashruuc loogu magac daray “Han iyo Hal-abuur.”
Mashruucan waxa ay SONYO ku dhiirigelinaysaa hal-abuurnimada iyo hindisaha da’yarta Somaliland.
Waxa mashruuca lagu ibo-furay wiil dhallinyaro ah oo reer Somaliland ah oo magaciisu yahay Eng. Siciid Cabdi Jiidhe oo bilaabay dhismaha helikobtar muddo sagaal sanno ka hor, taas oo sida uu sheegay u maraysa meel wanaagsan.
Waxa xafladda ka soo qaybgalay marti-sharaf ay ka mid ahaayeen Guddoomiyaha xisbiga Waddani ahna Guddoomiyaha Golaha Wakiillada Cabdiraxmaan Maxamed Cabdillaahi “Cirro”, Madaxweyne-Xigeenkii hore ee Somaliland Cabdiraxmaan Aw Cali Faarax, Xildhibaan Xaaji Cabdi-Waraabe oo ah odayga ugu da’da weyn Guurtida Somaliland, Xildhibaan Saleebaan Yuusuf Cali Koore oo ka tirsan Golaha Wakiillada, saraakiil khibrad u leh duulimaadyada iyo diyaaradaha, hawl-wadeennada iyo ururrada SONYO iyo aqoonyahan kale.
Agaasimaha SONYO Siciid Maxamed Axmed ayaa sheegay in SONYO ay muwaadinkan ku hawlan samaynta diyaaraddan helikobatar-ka la barbar joogsan doonaan taageero farsamo, mid dhaqaale, talooyin iyo tusaaleyn.
Eng. Siciid Cabdi Jiidhe ayaa isaguna sheegay in samaynta diyaaraddan helikobtarka ah uu hawlo badan u soo maray haddana ay ku dhawdahay gebogebo.
bandhige@mail.com