Marka laga yimaaddo ehelka oo mar walba goobjoog ka noqda aaska qofka geeriyooda, waxa xidhiidhadii qofka, xurmadii loo hayay iyo sida xaqa looga yimi looga tiiraanyooday laga dheehdaa hadba wadarta markaas xaadirka ah. Marxuun Baashe Yuusuf Cadde waxa yimi dad buux-dhaafiyay gegadii bannaanka ahayd iyo goobtiisii rasmiga ahayd.
Waxa aaska iyo ducada ka soo qaybgalay dadweyne fara badan, madax-dhaqameed, saxafiyiin, ganacsato, siyaasiyiin, culimo iyo qaybaha kala geddisan ee bulshada, kuwaas oo dhammaan ka marag furay dabeecaddii, dadnimadii iyo doorkii marxuunka.
Waxa aan ka xusi karaa:
Injineer Faysal Cali Waraabe Guddoomiyaha UCID
Axmed Maxamed Diiriye (Toorno) Wasiirka Waxbarashada
Muuse Ibraahin Selef Wasiir-ku-xigeenka Maaliyadda
Cabdicasiis Maxamed Xaashi (Cagaweyne) Ku-xigeenka Duqa Caasimadda Hargeysa
Maxamed Yuusuf Ismaaciil Agaasimadda Guud ee Wasaaradda Macdanta
Xildhibaan Axmed Xaaji Cabdikariin Yuusuf Mudane ka tirsan Golaha Wakiillada
Xildhibaan Ibraahin Mahdi Buubaa Mudane ka tirsan Golaha Wakiillada
Cabdicasiis Maxamed Jaamac Guddoomiyaha Dalladda SONYO
Cabdinaasir Yuusuf Cismaan (Qodax) Ku-xigeenka Xoghayaha Guud ee UCID
Cabdillaahi Maxamed Daahir (Cukuse) Lataliyaha Madaxweynaha Ee Doorashooyinka
Cabdillaahi Ismaaciil Cabdi Xubin ka tirsan Guddida Qandaraasyada Qaranka
Chief Caaqil Cabdirisaaq Maxamed Askar
Xuseen Cabdi Cawil (Foodcadde) Guddoomiyaha Waxbarashada Bariga Maroodijeex
Ganacsade Khadar Maxamuud Jaamac (Khadar Beyle)
Ganacsade Ismaaciil Cabdi Xasan Star Group
Sheekh Axmed Cabdillaahi Aadan (Shabcaan)
Dadka intii soo gaadhi weydayna waxa ay soo dawiyeen farriimo dhiillo iyo tacsi ah. Guddoomiyaha Xisbiga WADDANI Md Cabdiraxmaan Maxamed Cabdillaahi (Cirro) ayaa boggiisa Facebook ku baahiyay dhambaalkan:
Waxa aan tacsi tiiraanyo leh u dirayaa ehelka, qaraabada, asxaabta iyo qarankaba geerida naxdina leh ee ku timid Rabbi ha u naxariistee Marxuum Ex-Xildhibaan Baashe Yuusuf Cadde oo xalay ku geeriyooday 09/02/2020, magaalada Hargeysa.
Ilaahay Marxuumka su’aasha ha u fududeeyo, dambigiisana ha dhaafo, jannatul Firdowsana ha ugu deeqo. Aamiin
Ma koobi karno taararkii xambaarsanaa tacsida. Mar haddii se madaxdii qaranka mid yimi iyo mid farriin soo dirayba ay dareenka geerida innala wadaageen, waxa aynu ogaan karnaa in uu nin culusi galbaday. Looma kala hadhin qaybaha bulshada. Qormadan iyo tii horna waa muuqaal aan daawaadsiinayo intii aan nasiibka u helin inay kobtaas joogaan ee waayaha dunida u joogay meel kale ama hawli xannibtay. Weli se ma taaban, tilmaanna kama bixin taariikhdii Marxuun Baashe Yuusuf Cadde.
Waxa aynu Eebbe ka baryaynnaa in uu u aqbalo ducadaas uursamida ah ee loo hanneeyay, loo huray, gacmahana Weyne loogu hoorsaday. Waa qayb ka mid ah wanaaggiisii qofnimo. Muuqbaahiyeyaashaha e gegada soo gaadhay ayaa qaar ka mid ah ka-qayb-gelayaasha aaska ka duubay weedho duco, sagootin iyo Alle-bari ah. Dhammaantood waxa ay ka marag-fureen sidii ay ugu midaysnaayeen tognaantii iyo tayadii shakhsiyeed ee marxuunka.
Waxa aan qormada dambe ku soo tebin doonaa guudmar ku saabsaan sooyaalkiisii qofeed, xaaladihii kala dambeeyay ee noloshiisa, waayihiisii siyaasadda, xilligii ganacsadaha uu ahaa iyo inta aan ka tebin karo xog lagu aqoonsado.
Si aydaan qoraalka ugu daalin ayaan dhan dhan kale inoo wareejinayaa. Muuqaal ayaan idinku xawilayaa.Halkan Youtube ayaad ka daawan ka daawan kartaa qaar ka mid ah weedhihii aaska laga yidhi