Waxaan daah iyo daboolba saarnayn in waddankeenan ay kusoo badanayaan dad cadaana ama ajaaniba oo bilaa diin ah, dhaqan xumana inoola yimid. Sheekh Aadan-Siiro ayaa soo hadal qaaday nin gaal ah oo magaalada Hargeysa joogay oo hablaheena maalinba mid loo geeyaa dad badan ayaa ka hadlay arrinkaa oo u sheegay dad masuula laakiin cid wax ka qabata waayey.
Waa ayaan darro inteeda le’eeg in dadkeenii oo arkaaya hablahoodii oo la fasahaadinaayo daawanaaya, Allah Akbar waxa lagu ducaystaa Illaahayow na dil oo hana doorin.
Rasuulka ayaa wuxuu yidhi ma taqaanaan Dayuuska?
Waxay yidhaahdeen maya Rasuulkii Illaahayow ma naqaano ee noo sheeg.
Rasuulku wuxuu yidhi:
“Dayuusku waa qofka dadkiisa ama ehelkiisa xumaanta u ogolaada ee aan ka qaban.”
Maanta waxa Hargeysa jooga nin ka mida ragga ragga qaba adduunka ugu waa weyn macnaha (Ragga ragga guursada).
Magaciisu waa Anderson Cooper waliba waa kuwa u ololeeya in la badiyo raga-raga u taga, waxaan la sii yaabay isagoo tagay iskuul ka mida iskuulada caddaanka ku xidhan oo sawiraan la soo dhigay baraha Facebook-ga isagoo hablo yar yar oo xijaaban sawiraan kula jira.
Miyeynaan dhiig lahayn miyeynaan dhiidhiyeyn miyaanaynaan ahayn dad ay damqayso diintu, Waxaan is odhan jirey Sheeekh Aadan Sunne gardaruu u dhaleeceeya laakiin walaahi Sheekh Aadan wuxuu arkaayey wax aan idhaha laga qabsan karin.
Dawladeenuna waxay eegtaa kola ninka saanta cad. Waxaynu nahay waddankii ugu horeeyey ee Islaam ah ee uu cago dhigto wuxuuna ka faa’iidaynayaa xirfadiisa saxafinimo ee uu ka sito telefeshanka Maraykanka kuwa caansan ku jira.
Abwaan Hadraawi ayaa isagoo inoo sheegaya waxay damacsan yihiin saan-cadaalayaashu wuxuu yidhi:
Carwada dibjirkay dhalaan
Hadday kugu soo durkaan
Ducaa laga hoos galaa
Maxay damal weyn shiteen
Maxay qudhac deebiyeen
Waay dab sudheen dhirtii
Dhulkay midab dooriyeen
Bal eeg degelkii hufnaa
Bir iyo waxa daasad yaal
Bal eega dalkii xalaa
waxay lafo daadiyeen
Shil baa dunidii ka dhacay
Daacuun halisaa ku fiday
Duufaan simay baa la tegay
Doofaarrada aan gudnayn
Diin-laawaha gaalku dhalay
Maxay dulin faafiyeen
Maxay samo duudsiyeen
Maxay godob daaqsadeen
Maxay denbi xoogsadeen
Maxay dabar soo xardheen
Maxay dabin soo shaqleen
Danbeed maran soo asleen
Waxay dumiyeen aqoon
Ilaa dura soo taxnayd
Waxay damiyeen ilays
U daaran qof meel lahaa
Waxay kala daadiyeen
Daryeel isu dheelli tiran
Naf daahira bay legdeen
Docdeeda xun dhiiriyeen
Dan bay canlabeebiyeen
Dawgeedu xidhiidhsanaa
Waxay iga soo duween
Jidkaan isku daawan jiray
Waxay dibad yaaliyeen
Nin tiisa u door ahaa
In loo dawaray rabeen
Da’diisa nimaan baryeen
Waxay ka dhigeen dadkii
Af iyo labadiisa daan
Duugii ubadkay cuneen
Wixii jiray bay dubteen
Dusuud madhan bay dhigeen
Halkii beri doobi yiil
Waxay danbas tuumiyeen
Rugtii digo loo yiqiin
Duxdii noloshay tireen
Waxay debciyeen naftii
Waxay dacwadheen hankii
Waxay isku soo dareen
Dadkii kala caagganaa
Intii gabadh diib lahayd
Daf iyo kaman baa la tegay
Dhulkii darrimaha lahaa
Deegaantiyo baadku yiil
Dabaylo cas baa ka kacay
Dorraatiyo guulihii
Dallaallimadii dhisnayd
Wixii dalag meersanaa
Daaduun qaxay baa ka dhacay
Qalinkii Cabdi Cawiye