Shir muddo saddex cisho ah uga socday magaaladda Debre zeit ee dalka itoobiya, dawladdaha Somaliland iyo itoobiya oo ku saabsanaa istimaalka dekedda Berbera ayaa maalintii shalay lagu soo gabagabeeyey Debre zeit dalka itoobiya, shirka ayaa diirada lagu saaray socdka badeecadaha,ee ay Itoobiya kala soo degto dekedda Berbera.
Muddadii uu shirku socday waxa doodo iyo falanqeyn masuuliyiinta labada dawladdooda ka yeesheen sidii loo horumarin lahaa isticmaalka badeecadaha ay dawladda itoobiya ay kala soo degto dekedda Berbera, sidoo kale waxay masuuliyiinta Somaliland ku dheeraadeen in ay diyaar u yihiin in dhinacooda ay fududayn doonaan sidii heshiiskan horumar looga gaaadhi lahaa.
Shirkan oo ahaa shir muhiim ah ayaa waxa ka qayb qaadanayey Guddi farsamo oo ka kala yimi qaar ka mid ah wasaaraddaha Somaliland, Maareeyaha dekedda Berbera iyo madaxda safaaradda Somaliland ku leedahay Itoobiya, dhinaca Itoobiya waxa shirka ka soo qayb galay madax iyo masuuliyiin uu hoggaaminayo Agaasimaha Guud ee hayadda Itoobiya u qaabilsan Hawlaha Badaha Mr Mekonnen Abera, ugu horeyn waxa shirkaasi khudbad ka jeediyey Safiirka Somaliland u fadhiya dalka itoobiya Ambassador Adan Muuse Jibril oo ka sheekeeyey taariikhdii ganacsi ee Somaliland iyo Itoobiya u dhaxeeyey muddo badan oo boqolaal sanno, waxaana uu tilmaamay Ambassador-ku in heshiiskani yahay mid guul u horseedaya shacabka labada dal Somaliland iyo Itoobiya.
Geesta kale waxa isna kulnkaasi hadal ka jeediyey Maareeyaha dekedda Berbera Eng: Cali Cumar Maxamed โCali Xoor Xoorโ oo sheegay in heshiskani uu daba socdo heshiis hore oo labada dawladood ay wada galeen sanadkii 2005-tii,heshiskaasi oo ku saabsanaa isticmaalka dekedda Berbera,heshiiskana yahay kii labaad oo lagu dardar gelinayo hawlaha socodka badeecadaha dawladda iyo ganacsatada itoobiya ay kala soo dagaan dekedda Caalamiga ah ee Berbera, Cali Xoor Xoor ayaa sheegay in uu yahay heshiiskani mid u horseedaya horumar labadda dal ee Somaliland iyo Itoobiya.
Waxa kale isna shirkaasi ka hadlay Agaasimaha Guud ee hayadda itoobiya u qaabilsan Hawlaha Badaha Mekonnen Abera oo sheegay in uu ku faraxsan yahay heshiiskan ay kala saxeexdeen Somaliland iyo itoobiya ee ku saabsan isticmaalka iyo socodka badeecadaha itoobiya kala soo degto dekedda Berbera,wuxuu Mekonnen Abera tilmaamay in ay muhiim tahay sidii uu u fulin lahaa heshiiskan taariikhiga ahi iyo in labada dalba ka faaโiidaystaan isku socodka ganacsiga.
Somaliland iyo itoobiya ayaa waxa ka dhaxeeya iskaashi balaadhan oo dhinacyo badan leh, waxana xusid mudan in heshiiskani uu yahay mid muhiim ah oo sahlaya inay itoobiya badeeacadda badan kala soo degto dekedda caalamiga ah ee Berbera,waxana uu heshiiskani u horseedayaa labada shacabka ee Somaliland iyo itoobiya in ganacsiga ka dhaxeeyaa uu soo xoogaysto, isla markaana labada dal iyo labada shacaba ay ka faaโiidaysn doonaan midhaha heshiiskan taariikhiga ah.
Halkan hoose ka daawo muuqaalkan warkan: