Guddoomiyaha Golaha Wakiillada ahna Guddoomiye Waddani Cabdiraxmaan Maxamed Cabdullaahi Cirro oo maalmihii u dambeeyey ku sugnaa Maraykanka ayaa waxay kulan la qaatay Christopher H. Smith oo ah Guddoomiyaha Guddida Afrika u qaabilsan golaha Congresska Maraykanka, Chris Smith ayaa Gudidiisu ay golaha Congresska u qaabilsan tahay arrimaha Caafimaadka Caalamka, xuquuqda aadanaha iyo ururada caalamiga ah.
Ugu horrayn Guddoomiye Cirro ayaa sharaxaad ka siiyey Congressman Christ xaaladda siyaasadeed ee Somaliland iyo horumarka ay ka gaadhay nidaamka dawliga ah, isaga oo si gaar ah u dul istaagay in Somaliland ay buuxisay shuruudihii looga baahnaa qaran madax banaan.
Guddoomiye Cirro ayaa ย sidoo kale waxa uu kala hadlay masuulkan iyo xubnaha kale ee uu la kulmayba in ay ku dhiiradaan, in ay horseed u noqdaan aqoonsiga Somaliland, wuxuuna u sheegay in dani ugu jirto Somaliland iyo dawladda Maraykanka.
Sidoo kale waxa uu Cirro kale hadlay masuuliyiintan in ay ka shaqeeyaan sidii dawladda Maraykanku ay kor ugu qaadi lahayd mucaawanada ay siiyaan Somaliland.
Congressman Christ Smith ayaa si weyn u soo dhoweeyey weftiga Somaliland isaga oo aad ula dhacay horumarka ay Somaliland gaadhay iyada oo aan caalamka ka helin taageero buuran, wuxuu sheegay in uu diyaar u yahay in uu si dhow u dhegeysto arrimaha Somaliland oo uu la socon doono.
Guud ahaan kulanka ay yeesheen Guddoomiyaha Golaha wakiillada Somaliland iyo weftiga uu hoggaaminayey iyo Congressman Christ Smith ayaa ku dhammaaday jawi isfaham, iyada oo labada dhinac ay kala qaateen xidhiidhka ay isku dhaafsanayaan warbixinada.
Congressman Chris Smith, waa mudane laga soo doorto Gobolka New Jersey, wuxuu golaha Congresska ku jiray tan iyo sannadkii 1981-kii, waana markii 18aad ee dib loogu doorto golaha Congresska.
Chris Smith oo ka soo jeeda Xisbiga Jamhuuriga ee dalka Maraykanka ayaa ka mida mudanayaasha saamaynta ballaadhan ku leh golaha congresska, isla markaana waa dadka sida weyn loo qadariyo kelmedihiisa.
Weftiga Guddoomiyaha Golaha Wakiillada Somaliland uu hoggaaminayo ayaa intii ay dalka Maraykanka ku sugnaayeen kulano kala duduwan la qaatay Wasaaradda Arrimaha Dibedda Maraykanka, Hay’adda Mucaawinooyinka Dibedda u qaabilsan Maraykanka ee USAID, Golaha Odayaasha Maraykanka ee Senate-ka iyo Golaha Wakiillada Maraykanka ee Congresska.