Xukuumadda Sucuudiga ayaa ku dhawaaqday in ay diyaar u tahay in ay ciidamo u dirto dalka Suuriya oo uu ka holcayo dagaalka ugu ba’an ee hadda ka socda dunida iyadoo ay dalkaas ku legdamayaan kooxo dhawr ah oo mucaaridka ah, xukuumadda Suuriya iyo huwan aalami ah oo uu hoggaaminayo Maraykanku.
Xukuumadda Sucuudigu waxa ay sheegtay in dagaal dhinaca cirka ah oo kali ahi aanu xal ka keenayn Suuriya, sidaas daraadeed ay diyaar u tahay in ay ciidamo lug ah geliso dalkaas.
Dhawaqa Sucuudiga ayaa yimid kadib markii shalay ay xukuumadda Suuriya guulo ka soo hoysay dagaal ay ku qaadday mucaaradka dalkaas oo ay kaga qabsatay goobo istiraatijig ah oo cusub iyadoo caawimo dhinaca cirka ah ka helaysa dawladda Ruushka oo ay ka go’an tahay in aan xukuumadda bashaar Al-Asad meesha laga tuurin.
In kasta oo dunidu heshiis ku tahay kooxda ISIS oo ka hawlgasha Suuriya, haddana waxa hubaal an in ay dawlad kasta ugu hoos jirto dan u gaar ah, taas oo keentay in uu mar walba burburo shirarka dib-u-heshiisiinta ee dalkaas loo qabto.
Shirkii ugu dambeeyey wuxu Burburay Arbacadii kadib markii iyada oo wada-hadalladu socdaan ay xukuumadda Suuriya oo kaashanaysa Ruushku ay dagaallo cusub qaadday.
Bandhige@gmail.com