AHUN Maxamed Xaashi Dhamac (Gaarriye) ayaa maansadan tiriyey xili laga joogo 33 sanno ka hor wuxuuna ka hadlaayey shaqaaqo ka dhacday meesha la yidhaa HAYE-BARI oo laba reer oo isku deegaan ah dab la dhexdhigay oo laysku direy.
Maantana waxa taagan tii oo kale oo Dad walaalo ah laysku dirayo iyagoo ay ka dambeeyaan dad danno siyaasi iyo danno shaqsiba leh.
Hal madaw araar iyo maanso
Harawaati roob iyo mawjad
Murti iyo higgaad nabad-doon ah,
Waayahan haddeer ku salaysan
Ahna diirad keebka hagaysa
Berritana nin nool u hal-hays ah,
“Haye cala salaa” mar kaleeto
Dhoodaanna heestu ha gaadho.
Ma og tahay Hadraawi ma kuu war?
Ma og tahay habaaska dalluumay?
Ma og tahay hor-weynta la qaaday?
Ma og tahay in Hawd laga guurey?
Ma og tahay gabdhaha wada heermay?
Ma og tahay rasaasta habawday?
Ma og tahay hoggaanka la eeday?
Ma og tahay Hadraawi ma kuu war?
Ma og tahay “hiraay”da “wiraay”da?
Hadhaciyo bardaha laga caagay;
Haradiyo biyaha godobaysan;
Naylaha haraaryadu laysay;
Shimbiraha dhirtii hadhsan waayey;
“Hiih”diyo “hayaay”da baxaysa.
Ma og tahay Hadraawi ma kuu war?
Ma og tahay nacaybka la huurshay?
Ooryaha asayda hagoogtay;
Hooyada baroorta naf moodday;
Aanada ilmaha ku hadaaqay;
Dhalashiyo hablaha dhaxdin seegay.
Ma og tahay Hadraawi ma kuu war?
Ma og tahay habaarka dhisaalan?
Halasaha dagaalka sokeeye
Dhallintiyo halyeeyada le’eday;
Gacalkiyo hilbaha is-xasuuqay.
Wadhi wadhi hoheey cakuyeey hoh!
Habbisada dadkayga la saaray
Haan-haanta loo kala soocay
Ma-huraanka laysku lisaayo,
Hurdankiyo gabaaro-gurdayska
Halaq baa ku raad-gadanaaya.
Isagaa hubkaysugu dhiiba;
Hanadada sidaa ku shidhaysta;
Dabadeed hamuunta ku reeba.
Isagaa habeen iyo maalin
Godobtiisa reer huwinaaya;
Hadba shaadh qabiil u tolaaya.
Hindhisyaana saa qasab weeye
Dadku waa inuu hargab qaado,
Wadhi wadhi hoheey cukuyeey hoh!
Qoriyahaw hubsiino-la’aanta,
Qoriyahaw hawaawi-dhacaaga,
Qoriyahaw hinaase-la-boodku,
Jugtu waa waxaan la hagaasay.
Meeshiyo Hargeysiyo Juubba
Qoriyahaw halkaad cuskataaba,
Waa haar korkayga ku taalla;
Waa meel jidhkayga habaysa;
Dhaawaca anaa u hafeefta;
Giddi waa halboowle i qooman.
Wadhi wadhi hoheey cakuyeey hoh!
Umalkiyo naftayda hadraysa,
Hammigiyo sidaan u tol beelay,
“Hiq”du waa anoo ladi waayey.
Haybtaydi baa is-cuneeysa;
Garabkaygi bays wada heeray;
Maradaydi baygu huraysa.
Kugu-dhimayo-kaa-dhimay waa huq;
Rati heeryadiisa cunaaya
Hungo waa sidaan ahay maanta;
Dhanna hee dheh iima fayooba.
Anigaa colaadda ku hoobtay
Wiil iyo walaalba ka hoogay;
Anigaa hugaygu i diiday.
Iminkana haddaan la heshiinin
Hibashada haddaan la dawaynin
Hebel-yaa-lahaa la illaawin,
Himilooy wallee gabbalkaa dhac;
Talo-faro-ka-haaddaay mooyi;
Calanyahaw waxaad tahay loo-hadh.
Anigana hadhaw iyo faallo
Halistaa inaan ka afeeftay
Oo weliba hiif iga gaadhay,
HAGAR-LAAWE ii geli buugga
Taariikhda aan wax hilmaamin.
Qalinkii Cabdi Cawiye
+2524115877
Shaywaal12@gmail.com