Xidhiidhka ka dhexeeya qabyaaladda iyo doorashooyinka Soomaalilaan (WQ: Cali Cabdi Coomay)

Mar kasta oo ay doorasho timaado, waxa miciyo dhaadheer la soo baxa qabyaaladda. Wakhtigan way fududahay inaad aqoonsato qof kasta oo guri ku jira, gaadhi wata ama meherrad ku leh suuqyada reerkiisa. Waxaad markiiba ku arkaysaa sawirka ninka u sharraxan ama labada musharrax ee reerkiisa oo ku dhejisan hadba wuxuu wato ama guriguu ku jiro. Qabyaaladdii ayaa hadashay oo tidhi:

= Sun baan ahay qooshanoo, qaab iyo aan qiil lahayn, qaynuun waxa dunida jira, meelnaba aan kaga qornayn, qofkaan qasdigeyga garan, khiyaalaan ku ambiyaa, qabyaalad baa la I yidhaa, oo qaynuunkeygu waa sidaas.

= Hoggaan quman baan qaldaa, khuraafaad u akhriyaa, qaraabiyo eex baraa, laaluush qaadaan I dhaa, qardheer baan ka sii ridaa, qoomaamiyo ceeb buu dhaxlaa, qabyaalad baa la I yidhaa, oo qaynuunkeygu waa sidaas.

= Qaran baan qal-qaloociyaa, qaabkii dhismahaan qaldaa, dadkaan kala qaybiyaa, u kala qeydaa qabiil, qoortay iska wada jaraan, qoys-qoys u kala qaxaan, qobbiyo qorrax baan dhigaa, qabyaalad baa la I yidhaa, oo qaynuunkeygu waa sidaas.

= Qaar ladan baan qulbaa, quluubtoodaan rogaa, samaantaan ka qufulaa, qab iyo quudhsaan baraa, khaatumadaan seejiyaa, qoomamaan ku quusiyaa, qabyaalad baa la I yidhaa, oo qaynuunkeygu waa sidaas.

= Aramida waan soo qufaa, qaylodhaan baan abaabulaa, dad qiiraysan baan diraa, hubkaan qarxiyaay I dhaa, rag qiime leh baan dilaa, qaankiyo geelaan dhacaa, qeyd dhiig leh baan sitaa, qabyaalad baa la I yidhaa, oo qaynuunkeygu waa sidaas.

= qulubtaydu waa madow, belaa qalbigaygaa taal, qofkii khayr wadaan dilaa, wixii qurux loo arkaba far baan ku qaloociyaa, markay qulubtaan qoslaa, khasaaruhu waa ii wax-qabad, khayraad badan gubaa, qabyaalad baa la I yidhaa, oo qaynuunkeygu waa sidaas.

= Dhismaha qoys baan dumshaa, guurkan qalalaasiyaa, laba aroos quruxsataan, isuma qalantiin I dhaa, adoo reer qudhac nasaba, kani waa reer qansax fulaan, labadiina qolaan is geyin, qalanjiyo arbihii is-qabay, qar iyo buur kala degaan, qabyaalad baa la I yidhaa, oo qaynuunkeygu waa sidaas.

= Qardoofada laba qabiil, hoos baan wax u qaybiyaa, qabsoo qoonkaan qatalay, khilaaf cusub baan gashaa, qolof basal laga fujiyey, sideedaan u kala qubtaa, qarad iyo qorshe sugan ma lihi, qiyaastaan ku joogsadaa, waa kala qaad laba bahood, qabyaalad baa la I yidhaa, oo qaynuunkeygu waa sidaas.

= Anigu qaranimaan necbahay, arrimo qoys baan wadaa, qorshaha beel baan hayaa, ninkii ragihi wuu  I qabtaa, nacasna wuu igu qancaa, col baan qaban-qaabiyaa, dab baan ku qabtaa batrool, qabyaalad baa la I yidhaa, oo qaynuunkeygu waa sidaas.

= Qubuuraha waa badshaa, midnimadu waa ii qadhaadh, qumaatigu waa ii qallooc, qabkey waa fool xumo, adeegay waa qas wade, colaad baan qaayibaa, qaataha qorigaan jeclahay, qabyaalad baa la I yidhaa, oo qaynuunkeygu waa sidaasi.

Qabyaaladdan is-micnaysay waxa buugiisa Sababihii Burburka Soomaaliya ku qoray qoraaga C/qadir Aroma AHN.

Cali Cabdi Coomay

Suxufi, qoraa ah.

Hargaysa, Soomaalilaan

Calicoomay@gmail.com