Wefti uu hogaaminayo madaxweynaha Somaliland mudane, Axmed Maxamed Siilaanyo ayaa gaadhay magaalada Berbera May 10 2017, intii uu jidka ku sii jiray madaxweynuhu waxa uu soo dhawayn balaadhan kala kulmay shacbiga ku dhaqan degmooyinka, tuulooyinka iyo magaalooyinka u dhexeeya Hargeysa iyo berbera, waxana socdaalka madaxweynaha ka warbixiyey afhayeenka madaxtooyada mudane, Xuseen Aadan Cige (Deyr).
Afhayeenka ayaa saxaafadda kula hadlay xarunta madaxtooyada ee gobolka Saaxil, waxaanu yidhi:
“Madaxweynuhu wuxuu galabta ka soo ambabaxay magaaladda Hargeysa, isaga oo socdaalkiisu uu ku eeg-yahay magaaladda Berbera, taas oo maalinta bari ah oo ay bishu tahay 11 lagu qaban doono xafladii si rasmi ah loogu wareejinayey shirkada weyn ee DP World dekada Berbera. Xafladaas ayuu madaxweynuhu ka hadli doonaa.”
Afhayeenka oo hadalkiisa sii wata ayaa intaas ku daray:
“Safarka madaxweynuhu wuxuu ku eeg-yahay magaaladda Berbera; ujeedada ugu weyn ee madaxweynuhu u yimi waxa weeyaan mashaariicda qiimaha leh ee xukuumadda uu gadh-wadeenka ka yahay Axmed Siilaanyo ay ku talaabsatay, madaxweynuhu wuxuu doonaya inuu umadda jamhuuriyadda Somaliland uu ku dhiiri-galiyo kuna baraarujiyo in la soo dhaweeyo horumarka iyo mashaariicda qiimaha u leh dalkan, sidaas daraadeed mashruucan DP World waxa uu ka mid yahay mashaariicda qiimaha leh ee xukuumaddan madaxweyne Axmed Siilaanyo gadh-wadeenka ka yahay ay dalkan ka fulisay.”
Weftiga madaxweynaha socdaalkan waxa ku wehelinayey, Gudoomiyaha Xisbi Xaakimka Kulmiye ahna Murashaxa doorashada Madaxtooyada Mudane Muuse Biixi Cabdi, marwada koowaad ee qaranka, Marwo Aamina-weris Sheekh Maxamed Jirde, wasiirka arrimaha gudaha, wasiirka madaxtooyadda, wasiirka arrimaha dibeda, wasiirka maaliyada oo hore u sii joogtay gobolka, wasiirka ganacsiga, iyo masuuliyiin kale oo 
ka tirsan xukuumadda.
Halkan hoose ka daawo muuqaalka warkan: