“Gabay: Waayaha tahriibta iyo wacyiga maanta taagan.”
Gabaygan “Dalandool” waxa uu soo baxay 13kii bishii 12aad ee sannadkii 2014-kii.Waxa uu si aan la dhudhumin karin uga hadlayaa tahriibka iyo saamaynta taban ee ka dhalata. Inkasta oo tahriibku waqtigaas uu jiray, haddana waxa taagan maanta dareenkii iyo waayihii uu ka warramayey gabaygu hal sanno iyo badh ka hor. Abwaanku waxa uu ku soo bandhigayaa tixdan dalanbaabiga iyo daalaa-dhaca lagala kulmo suudalka, waxa uu si qoto dheer ugu lafa gurayaa duruufaha ay tahriibayaashu la kulmaan, raadadka ay kaga taagan dalka, dadka iyo saxariirka ay ku mutaan safarka dheer ee ay galaan.
Si guud iyo si gaar ah ba waxa uu daboolka uga qaadayaa xaqiiqada waddanka taalla iyo nimcooyinka Weyne innagu galladay ee amni, dal, duunyo iyo dadba leh. Waxa uu uga digayaa dhammaan cid kasta oo Alle yaqaan ah, oo in uun Iimaan ku jiro, biimaynta iyo is-ku-miidaaminta tahriibka oo aan If iyo Aakhiro midna lagu aflxayn.
Waxaanu Abwaanku ku bilaabay gabayga:
Cabdiyow dabuubtiisa gabay darajo weeyaane
Waa deeq Ilaahay baxshaan duunyo goyn karine
Ducuf baa dilaayoo intaa dhuunidoon ku ahe
Duul baa danbaab iyo ku gala diradiraalaaye
Qaarbaa xumaantuun dalboo duudsi loo diraye
Deli buu ka tuuraa ninkaan diinta garanayne
Mindi weeye labadiisa daraf kii la doonaba e
Dubaax malaha maansadu haddaan loo kitaab dayine
Daandaansi iyo caydu waa doqon afkeediiye
Anigana dedaalkaygu waa danaha waaweyne
Dad ka oo hagaagaan jeclahay labada daarood e
Xasadbaa arlada dooriyee daacad baan ahaye
Daaciga wanaagaan ahoo samo ka daalayne
Khayrkaan u doonyaysanahay daa’in abidkay e
Goldaloolo ii muuqataan diirad ku hayaaye
Gabaygana is kuma daaliyee way gu soo degaye
Durdur aan go’aynbaan ku ahay deelka maansada’e
Aan daruuro caawana tixday dihatay laabtaydu
Sidii daad mahiigaan bal aan idin dabbaal siiyo
Idinkuna dabuubtii dhegaha iigu wada deeqa
Da’yartii dadkeenna u kacdee lagu dedaalaayay
Da’yartii diraasada dhigtee waayo lagu daalay
Da’yartii la daadihinayee loo danquminaayay
Da’yartii dadkoodu islahaa darajo gaadhsiiya
Waa taa Ibleys duufsadoo loo durbaan tumaye
Dariiqaa la dalandoolayaa loogu daw galaye
Diibkiyo waraabuu ka dhereg doorkan maanta ahe
Maydkooda wada daadsan baa cidina duugayne
Dugaaggii hilbaha quudan jiray doogsin buu helaye
Jiidhkiyo caddiintoodi buu dalam ka siiyaaye
Qalfoofuhu dureemada ka badan dibadda yaallaaye
Hal kaloo idiin daran haddaan idin dareensiiyo
Duul kaa naftoodii dilaye dibad u yaacaaya
Duulkaa daliilkii sharciga dacal ka dhaafaaya
Ee waalidkood dayriyaye daafadda u waayay
Cabdiyow dariiqada Alliyo diinta caasiya e
Danbi dhaaf Ilaah siiyo iyo derajo mooyaane
Aakhira degaankoodu waa degelki naareede
Dayaciyo duruufaa la tegay u dubcaddeeniiye
Waa kuwaa dibnaha aar galaye mawd guddoonsadaye
Harraad loo dayoobiyo intii gaajo dili wayday
Dabin bay ku daateen iyana daallin sii dhigaye
Madaxfurasho doolaara baa loogu daw galaye
Dawakha iyo wareerkii ku dhacay waalidkii debecye
Qaylada dareen ka leh markii la gu digniin siiyay
Waa lay deldelaayaa ilmii ugu danbaysiiyay
Illeen waa durriyadaad dhashoo duud ka soo go’aye
Jidhku waa dubaaxyaynayaa waa damqanayaaye
Dayn soo galyaa iyo xigaal deeq u fidiyaaba
Daartii dilaal ka u diryoo duunyo bixiyaaba
Lama waayo xoolaha dirqiye waa un loo diriye
Lafta diisan duudkoo burburay duubiyada xoogga
Duul baa la naafeeyayoo aan diyo lahayne
Qaar baa dalluumo iyo jeel loogu daa’imaye
Niman daallimiinoo ku mamay doolarkiyo baadda
Oo wada diyaaraa jiroo laga dibboonayne
Tahriibtaa dareeraysa bay kala dillaalaane
Doonyaha la dhoobdhoobayay daakhilkaw dhigiye
Duunyada sideedoo kalaa loogu daabuliye
Waxa ay la sii daakiddoo doc u la heehawdo
Mar uun bay dabayl mawjad lihi dubuq ka siisaaye
Dabbaal kaga baxyaa iyo Ilaah duul u bixiyaaba
Mawdkiisu kii aanu dilin daanta kale gaadhye
Dulligaa wixii badayna waa damac adduunyaade
Afartaa murtida diirran iyo dedabdhiggeedii dheh
Gugoo deelmay daad koo rogmaday gal iyo duufaan dheh
Onkod dininigleeyiyo hillaac danabadiisii dheh
Darandoorri baaska u dhiciyo dab iyo baaruud dheh
Xigmad Daa’im kay i bariyo deelleydii gabay dheh
Duluc kalana waa maansaday dihatay laabtaydu
Iyadoo dalkeennii nimcadu dibadda taaltaallo
Iyadoo shidaal diirran iyo dahabba hoos jiifo
Iyaday durdurayaan biyuhu gu iyo dayrtiisa
Oo dalagga beeruhu dedaal innaga doonaayo
Oo duunyadeennii dhashoo darar la maalaayo
Dirrimo iyo dooxyiyo bannaan daawad lagu foofsho
Buuraha daboolane macdani daakhilka u taallo
Dekadiyo baddaa daahan ee nagu dul meegaaran
Khayraad kan duugaabay aan cidi danaynaynin
Malahayga duul kii lahaa waa dad aan dhalane
Iyadoon colaad laga didiyo diifi nagu oollin
Oo nabad daraadeed shacbigu wada dakaynaayo
Oo dawladdoodii amniga ugu dedaalayso
Bal maxaa dalkeennaa dihine looga dalandoolay?
Dariiqaa halaagga ah maxaa loogu dabar beelay?
Sidii dabato iyo caydh maxaa la isu daba yaacay?
Dhallinyaro daruur u eg maxaa badaya diihaalka?
Dad cawaan ah diinlaawayaal duur cid la ah jooga
Hablaheenna diib ka leh maxaa dooxato u geeyay?
Ma damiirki baa idin ka tagay xumaha diidaayay?
Duqaydiyo suldaan duub leh iyo duluc abwaaneedka
Wadaadada digniintiyo wacdiga waano damin waayay
Intaas oo dardaarana maxaa loogu daba jeedshay?
Dawarsiga Nasaarada maxaa derajo loo mooday?
Faranjiga dugaagga ah maxaa looga daba yaacay?
Duleedada kufaartiyo maxaa dibad idiin yaalla?
Iyagaa faqrigu daashadoo daaqad loo sudhaye
Waa waxaan Ilaah Daa’imiyo diinta aaminine
Doolar kay ku siiyaanna waa sun iyo deebaaqe
Dacwadduu wataa baa ka wayn deeqo bixin taase
Ilaah deeqsiyaan leenahoo khayr ka dalabnaaye
Derajada Islaam kaa is ka leh labada daarood e
Idinkoo haldoor ka ah maxaa idin dullaynaaya?
Risqigaad u dalandoolaysee daliga kaa tuuray
Risqigaad naftiinna u disheen waa mid daabacane
Dunidaba adaan joogin baa Daa’im kuu qoraye
Hal daqiiqo kuma seegi karo deeq laguu wacaye
Daacigii Rasuulkaa yidhoo diinta lagu sheegye
Ilaah baa diyaarshoo dimmada saaray waa hore e
Ciddii dux iyo iimaan lahey galiya duunkiinna !