Beri dhowayto aniga oo nin oday ah sida uu Af Soomaaligii u sii dabargo’ayo ee maalinba uu luxudka ugu sii durkayo kala sheekaysanaya, ayuu tuduca ama baydka sare ku xusan ii mariyey oo igu yidhi bal maxaad kanna ku fasiri lahayd?
Oo dee maxaan ku macneeyaa?! Gosol iyo gaadeeri, oo ah labada isir ee gabyaagu beydkan is barbardhigga ku samaynayaa ee uu macnihiisuba ku qotomo, xaggee baan ula kacaa!
Odaygii baa ii macneeyo, welibana qaar kale na iigu sii daray. Markii uu se dhaadey in aan afkiisa eegayo oo ereygii uu yidhaahda ba aan qalinka kula roorayo, ayuu maankiisii ii godlanaa iga gaaggaxay!
Intii aan ka haleelay baan is leeyahay is dhaafi. Waa qaar ka mid ah labka iyo dheddigga ugaadha geyigeenna oo aan hore na halkan u soo dhigay, haddana ugu soo celiyey si intii aan hore u haleelini uga bogtaan.
Gosol iyo gaadeeri baa ka mid ah.
Waa “baqal fardo la mirataa dhiggood bay is mooddaaye”, gososha oo ah dheddigga biciidku waxa ay muuq iyo martabadba ka roon tahay oo iska biddaa gaadeeriyada oo ah dheddigga goodirka.
Qaar ka mid ah labka iyo dheddigga ugaadha:
Labka biciidka = Saryan, dheddiggiisana gosol ama cubley.
Goodirka dheddig = Gaadeeri/Adeeri
labka goodirka = Laba qoolle
Dheddigga gorayada = Gorayo-cawl, labkeedana goray-haldhaa
Sakaarada lab = Atoor, dheddiggeena yac, guunyo, golcas ama qusley
Labka cawsha = Jucuur, dheddiggeedana masaal
Garanuugta labkeeda = Liig
Labka maroodiga = Arbe, dheddiggiisana Qalanjo
Labka libaaxa = Aar, dheddiggiisa gool
Waraabaha lab = Dhurruq, dheddiggiisana Candhadheer
Fardaha: Lab = Sange, Dheddig = Geenyo
Bisaaska dheddiggiisa = dinnad ama makulaal ama yaanyuur, labka na curri
Dacaw iyo dayo
Halkaas baynu ka sii wadi karnaa, illayn waa wax isu gaygayne!