Horumarka aadamuhu sameeyaa, khasaara iyo faa’iido labada waa laga helaa.
Baabuurtu waxay ka mid yihiin marka loo eego casrigan aynu noolahay baahiya asaasiga ah ee aadamuhu aanu ka maarmi Karin miyi iyo maagalaba meeshuu doono ha joogee,
Balse Khaasaraha iyo faa’iidadoodu waxay ku xidhan tahay hadba sida loo isticmaalo.
Wax kastana shuruudo iyo aqoon u gaar ah u baahan yahay, suurto galna maaha adigoo aan baran haddii aad tidhaado waan kaxaynayaa. Baabuurtuna sidaa oo kale ayey u baahan yihiin, haddaba maxaa ka dhalan kara, waa jawaab iska cad. dhimasho iyo khasaare badan baa maalin walba dhaca, cida ay gaarka u taabanaysaa waa carruurta yar yar ee maalin walba gaawadhu ku jiidhaan wadooyinka xaafadaha, magaalooyinka, tuulooyinka, hadba meesha ay marayaan wadayaashu.
Waynu ognahay ,laamaha nabad gelyada wadooyinka ayaa u darban oo cadeedaad aragteen iyo roobkaba u taagan una diyaar u ah inay kala hagaan baabuurta, oo ay nidaamiyaan marka laga hadlayo magaalooyinka waaweyn, iyadoo mar walba lagu canaanto wadayaashaa lana wacyigi galiyo, haddana arinkoodu wuxuu noqday
” dhego laydh u daloola “
Hadba waxaa aniga I damqayb oo qoraalkan kooban igu kalifay, qayrul masulnimada Dirawalada baabuurta wada noocay doonaan ha ahaaadeene, waxyeelada ay carruurta yar yar u geysanayaan ee ay nafahooda u galaafanayaan gabal dhaciyo waagii guduutaba.
Talo bixin
- Dawladu xil hoos ha u eegto baabuurtan magaaalooyinka cidhiidhiga ah xawaaraha sare ku dhex maraya.
- Dib ha loogu noqdo shuruucda u dejisan wada marista iyo dhaqan gelintooda
- Hala hubiyo cida baabuur wadi karta iyo cida aan wadi Karin tusaale, waxaa jira dad badan oo maskax ahaan buka oo hada baabuur wada, waxa kale oo jira qaar iyaguna jidh ahaan xanuunsanaya oo baabuurtii wada
- Carruurta wadooyinka garoomada ka dhigtay ee halista ku sugan, bal ka fikira sidii garoomo ay ku madadaaloodaan loogu samayn lahaa si looga badbaadiyo khatarta gaadiiidka
- In qof kasta oo gaadhi kaxaynaya imtixaan adag laga qaado,oo aan daaha dabadiisa looga dhibiin liisanka
- In qofka khalad gala ciqaabtiisa ama ganaax adag la mariyo, tusaale ahaan wadamada qaar mudo dhan Ayaan looba ogaalaan qofka ku gefa nidaamka wada marista
- Wadaayaashana waxaan leeyahay, “nabad galaa dheereeye” waxa kale oo somaalidu tidhaa ” qunyar socde qodaxi ma mudo”
Ugu dambayntii dhamaanteenba masuuliyad baa ina saaraan, carruurtan innagaa ka masuula ee haloo naxariisto waa ubaxii dalkeene .
Afeef: shilalka gaadiidka qaar waa qadar alle ilaahay baana ugu talo galay inay sidan u dhacaan, laakiin inta badani waa qalad aynu samayno iyo taxadir la’aanteena
WQ: Kamaal Xasan Isaaq
Tell: 00252-63-4402758
Hargeysa Somaliland