Wasiirka Madaxtooyada Jamhuuriyadda Somaliland Maxamuud Xaashi Cabdi iyo wefti oo horkacayey oo ka socda Xukuumadda Somaliland ayaa maanta xadhiga ka jaray Mashruuca Cadceeda laga dhalinayo koronto oo laga hirgaliyey Laascaanood.
Mashruucan oo uu hirgaliyey gacansada Reer Sool ee Xaaji Maxamed Jabuutaawi, oo ay Xukuumadda Somaliland door weyn ku lahayn hirgalintiisa ayaa maanta laga furay magaalada Laascaanood, waxa munaasibad balaadhan oo loo qabtay ka qayb galay masuuliyiin kala duwan.
Wasiirka Madaxtooyada Somaliland Maxamuud Xaashi Cabdi oo ka mid ahaa madaxdii xafladaasi ka hadashay ayaa si weyn u bogaadiyey Ganacsade Maxamed Jabuutaawi, waxaanu yidhi:
โWaxaan runtii jecelahay inaanu ku bogaadino ganacsadaha Maxamed Jabuutaawi maalgashiga qiimaha badan ee uu sameeyey ee ah in cadceeda koronto laga dhaliyo mashruucaas aad ayaanu ugu hambalyeynaynaa aadna waanu ugu bogaadinaynaa, waxa kale oo aanu jecel nahay inaanu ku bogaadino inuu ku dhiiraday aduun badana galiyey mashruucaas.ย Mashruucani shaqo ayuu abuurayaa, dad badan oo dhalinyaro ahbaa ka shaqayn doona, waxa kale oo uu hoos u dhigi doonaa qiimaha korantada magaalada oo iyadana ay maslaxada ummaddu ay ku jirto, waxa iman doona tartan caafimaad qaba, hadii shirkad kaliyi magaalada shidi jirtay, in laba iyo sadexba ay magaalada shidaan way u baahan tahay, Laascaanood-na waa magaalo aad u weyn bulsho badanina ay ku dhaqantahay inay adeegyo badan hesho ayaa lagama maarmaan ah.โ
Wasiir Maxamuud ayaa sidoo kalena ka hadlay horumarka loo baahan yahay in laga hir galiyo Magaalada Laascaanood waxaanu yidhi:
โAdeeg koronto oo laga haqab beelo oo jaban, adeegyo talafoono, kuwo caafimaad, kuwo waxbarasho iyo dhamaan adeegyada ay nolosha casriga ah ee reer magaalka ayey u baahan tahay Laascaanood. Waxa kale oo aynu iyagana bogaadinaynaa ragga kale ee muwaadiniinta ah ee mashaariicda kale ee maalgashiga ah ku soo kordhiyey gobolkan, ee ay ka mid yihiin kuwa biyaha sifeeya, kuwa biyaha soo saara, kuwa talafoonada, iyo shirkadii hore ee laydhka ee magaalada shidi jirtay, waxaas oo dhami waa maalgashi, dhamaantood waanu bogaadinaynaa waananu hambalyeynaynaa.โ
Wasiirka Madaxtooyadda ayaa ugu dambayntii si weyn ula dardaartay Ganacsadata reer Sool oo uu ugu baaqay inay sameeyaan tartan xalaal ah oo cunfi iyo dagaal ka madhan waanu yidhi โDardaaran waxaanu leenahay in la tartamaa nolosha ayey ku jirtaa, xitaa khayrka ayaa loo tartamaa oo ILLAAHAY (SWT) ayaa inagu yidhi โ Saabiquu ilal khayraatโ mar kale ILAHAY janooyinka u tartama ayuu inagu yidhi, markaa in noloshada lagu tartamaa waa wax wanaagsan cudur maaha. Waxaanu leenahay waa in loo tartamaa si caafimaad qabta, waa in loo tartamaa si bisayl, waayeelnimo iyo mudakarnimo leh. Waa in loo taramaa iyadoo la dhawrayo qawaaniinta ummadda u taala, waa in loo tartamaa iyadoo la dhawrayo maslaxada guud ee ummadda u taala. Dadku waa inuu danaha guud ee ummadda ka fakaraa, dadkani waa macaash doon waa in aynaan la yaabin iyaguna waa inay danta guud ee ummadda ku daraan.โ
