Mahad oo dhammi waxay u sugnaatay Allaha weyn ee waaxidka ah ee inagu simay akhriska qormadeennii sagaalaad ee taxanaheennan la magac baxay, gobolnimo raadiskii Gabiley.
Qormadeenan maanta waxaynnu shiishka saari doonnaa- haddii Ilaahay idmo- lafogurka waxa Gabiley u galay gobolnimadan ay ku xiiqday!
Ma xuma oo waa su’aal la isweydiin karo oo jawaabteeda u baahan. Waxase barbar taalla su’aal kale oo ah, maxaa Gabiley gobolnimada buuxda loogu diidan yahay illaa iyo taariikhda aynnu soo tilmaanay?
Haddii aynu ku horrayno jawaabta hore ee aynu kaga jawaabeyno, maxaa Gabiley ka soo gelaya gobolnimada buuxda? Waxan filayaa in aynaan jawaabta meel fog ka raadineyn; Waana sida tan:
- Gabiley gobolnimada buuxda sharaf ayaa ugu sugan (Pride).
Halhaysyada haweenka Soomaaliyeed waxa ka mid ah:
“Wixii qayrkaa qabo, qosol kuugu dhan!”
Gabileyna waxay leedahay:
Anigoo guyaal hore
Gayaankay ka roonaa
Maxaa guunta iga dhigay?
Een guurkii u seegaa?
Marka golaha loo baxee
la gorfeeyo xaajada
maxaa lay giriifee
garta layga qadiyaa?
Marka gool la qalo ee
hilbihii la kala guro
Meesha lama gayaaniyo
Maxaa gowraca i baday
Marka gogosha loo baxee
gadhmadoobe taliyiyo
raggu ay gabyaayaan
Miyaan sii gandoodaa?
Gasiinkii dalkeenniyo
Anoo guunyo haystoo
gaajoonin waligey
Sidee lay gumeeyaa?
Gobolnimada dhimaniyo
Gefka iyo xumaantiyo
Guux aan dhammaaneyn
Goormaan ka baxayaa?
2) Gabiley waxay dooneysaa, in ay qayrkeed ku dherersato oo ay weliba dhaafto!
3) Waxay Gabiley rabtaa – haddii Rabbi la qabto, in aanay dhinnaan ee ay dhammays noqoto!
4) Waxay Gabiley rabtaa, caddaalad iyo sinnaan Somaliland u siman tahay oo aan la kala sed roonaan.
5) Waxay Gabiley rabtaa, ka dhabaynta iyo dhammaystirka halgankii gobolnimo ee guyaasha ku qaatay!!
Haddaba, su’aasha taagani waa sidee sedkaa maqan lagu gaadhayaa?
Waa innoo qormada dambe iyo qaadaa dhiggeeda – haddii Eebbe idmo.
Wa bilaahi At-towfiiq
Cabdilaahi Maxamed Cumar
Email: timacadde56@hotmail.com