Waa war farxad weyn u leh qarankan in dawlada Itoobiya ay siisay Somaliland deeqo waxbarasho oo dhan 115, waa abaal iyo waxtar weyn, Waxa’se uu warwar naga hayaa in sidii kuwii hore loo musuq-maasuqo oo cid aan xaq u lahayn la diro sidii dhacdey sanadkii tagay oo laba nin oo isku reeri siday donaan u maamusheen deeqdii waxbarasho ee Itoobiya ina siisay.
Waxaan wasiirka waxbarashada oo aan ixtiraam weyn ugu hayo in uu aad uga qaliyay sidii loo maamulay deeqdaas sanadkii hore lay’na siiyay isagoo markaa xilka ku cusbaa hortiina wax isdaba marintu dhacdey, waxaan maanta uga fadhiina in uu si cadaalad ah oo ka xallan musuq,eex iyo wax isdaba-marin ugu qaybiyo ardeyda iyo shaqaalaha qarankan deeqdan ummadda ka dhaxaysa. Wasiir waan dhawraynaa bal in aad marto wadaadi kuwii kaa horeeyay iyo in aad tariikhda ku gasho in aad noqoto wasiirkii ugu horeeyay ee si hufan oo ka xallan musuq ugu qaybiso qarankan deeqdaas ka dhaxaysa!
Sidoo kale waxaan safiir ku xigeenka safaarada aynu ku leenahay Itoobiya, oon aan ixtiraam weyn ugu hayo dadaalkiisa shaqada uu inooga hayo Itoobiya, waxaan ka filayaa in uu ceeb ka dhawro deeqdaas layna siiyay oo uu ku simo wasiirka oo waliba uu joogo oo uu hubiyo in deeqdaas loo qaybiyo si cadaalad ah.
waxaanan ku talin lahaa hadii lays maqlaayo 100undergraduate waxa ugu mudan in la siiyo ardeygii ugu sareeyay imtixaankii laga qaadey ardeyda Somaliland oo dhan iyo 99kii ardey ee ku xigay waayo cid walba/gobolkasta wey leyihiin dadaalkooda ayayna ku galeen kaalintaas waliba abaal marin’na wey u noqon raad iyo farxad ku reebta ardeydaas. 15 postgraduate waxaan ku talin lahaa in loo qaybiyo shaqaalaha qaranka ee wasaaradaha ay ka shaqeyaan u bahan yihiin takhasusaaska deeqda laynoo siiyay iyaga oo laga saxeexayo in ay ugu yaraan 5sano qaranka ugu shaqeyaan cilmigay u soo barteen iyadoo shahaadada laga haynaayo shantaas sano.
Hadii sidii kuwii hore loo maamulo deeqdan waa in aynaan amusin’e waa in aan cod-dheer oo gaadha ilaa Itoobiya ku sheegna in la musuqay deeqdii layna siisay. “AMUSNAANTU WAA XUMAANTA, MUSUQA IYO CADAALAD DARADA OO AAD TAGEERTAY”
waxa qoray: Cabdikariin Axmed Mooge